San Juan bezperako kantu saioak

San Juan bezperan ohikoak dira suaren inguruan dantzak, kantuak, doinuak,... Aurten egoera berezi honetan, jendetza biltzerik ez dugu izango, hala ere, auzoetako kantuzaleek deialdi txikiak egin dituzte kantu saioak egiteko. 

Horrela, Groseko Nafarroa Beherea plazan, 19.30ean elkartzeko deialdia egin da kantuan aritzeko. 

Bestetik, Amara berriko Ikasbide elkartean, 21.00etan bilduko dira kantuan ibiltzeko. 

Donostiako Plaza Berrian, gaueko 22.15ean, San Joan bezperako ekitaldia antolatu dute. Bertan Donostiako Orfeoia, Udal Txistulari banda, Goizaldi dantza taldea eta beste dantza taldeetako ordezkariak izango dira eskainiko duten ekitaldian. Sarrera mugatuta dago, eskaera egin dutenentzako. Hala ere bai Euskal Telebistan baita streaming bitartez ikusterik egongo da, (Donostia San Sebastián Festak-en YouTube kanalaren bidez emango da zuzenean.)

Donostia Kantuz berpiztu da!

Aurreko larunbatean, konfinamendutik atera eta kantuz entzuterik izan genuen Donostiako Plaza Berria. Hainbat kantuzale bertan bildu, eta jirarik gabeko kantu saioari ekin zitzaion.
Hemen duzue, NAIZ egunkarian jasotako berria eta bertan grabatutako bideo bat:
NAIZ: Donostia kantuz taldea plaza Berrian

Ekainaren 20an DONOSTIA KANTUZ bueltan da!!!

Hainbat hilabete egoera berezian igaro ondoren, gure hiriko isiltasuna apurtu eta DONOSTIA KANTUZ jarri nahi dugu berriro ere. Horretarako hitzordu berezi batera gonbidatu nahi zaituztegu:

- Datorren ekainaren 20an, larunbata, eguerdiko 12:00etan, Donostiako PLAZA BERRIn, KANTU SAIO berezia egingo dugu. 

Ez gara bertatik mugituko, babes neurriak, eta distantziak bermatuko ditugu, eta horretarako lurrean kokatutako borobiltxoetan jarriko gara, mugitu gabe, eta bakoitza bere maskarilarekin. Guztira 10 kantu abestuko ditugu, borobil txikitik handira guztiok bat eginik elkarrekin. 

Animatu beraz, eta zatozte gurekin kantura, berpiztu daigun gure DONOSTIA!